Ստամոքսի այրոց. armeniamedicalcenter.am

Այրոցը ախտաբանական ախտանիշ է, որը տարբեր պատճառներով տհաճ այրոցի, երբեմն` ցավի, զգացողություն է առաջացնում էպիգաստրալ շրջանում և կրծոսկրի հետևում: Պատճառը ստամոքսի պարունակության անցումն է դեպի կերակրափող և նրա գրգռումը:

Պատճառները

Պատճառները տարբեր են. մարսողական համակարգի սոմատիկ հիվանդություններ, որոնց թվում` բարձր սեկրետոր ֆունկցիայով քրոնիկ գաստրիտ, լյարդի, լեղուղիների կողմից խնդիրներ:

Նպաստող գործոնները.

• վնասակար սովորություններ,
• սպեցիֆիկ սննդի օգտագործում (թթու մրգեր, կաթնաթթվային մթերքներ, սև հաց),
• որոշ պացիենտներ գանգատվում են այրոցից` ճարպոտ, կծու, տապակած և մարինացված սննդի չարաշահումից հետո,
• ալկոհոլային խմիչքների օգտագործում,
• ծանրության բարձրացում (ներորովայնային ճնշման բարձրացում),
• հղիություն,
• դիաֆրագմայի ճողվածք:

Ախտանշանները

Տհաճ զգացողությունները և անգամ ցավը կարող են ի հայտ գալ սնունդ ընդունելուց հետո կամ դրանից որոշ ժամանակ անց և ունենալ արտահայտման տարբեր ուժգնություն: Որոշ հիվանդությունների ժամանակ այրոցը լինում է գիշերը (քաղցած ցավեր):

Ստամոքս-աղիքային հիվանդությունների դեպքում այրոցին միանում են նաև հիմնական հիվանդության ախտանիշները: Լյարդի և լեղուղիների հիվանդությունների ժամանակ ցավեր լինում են նաև աջ թուլակողում, ունենում են սրտխառնոց, փսխում` լեղու պարունակությամբ:

Բարձր սեկրետոր գաստրիտների ժամանակ պացիենտը գանգատվում է թթու գխտոցներից, ստամոքսի շրջանում ծանրության զգացումից, որովայնի փքվածությունից, մեթեորիզմից:

Երբեմն էպիգաստրալ շրջանում այրոցը, տհաճ զգացողությունը վկայում են անգինալ-սրտային ցավերի մասին: Դրանք տարբերակելու համար պետք է ընդունել վալիդոլ, նիտրոգլիցերին: Անգինալ ցավերը դրանից հետո անցնում են:

Ախտորոշումը

Հարկ է դիմել գաստրոէնտերոլոգի: Անհրաժեշտ են կոմպլեքս հետազոտություններ` այրոցի պատճառը պարզելու համար.

• գաստրոսկոպիա,
• որովայնի խոռոչի, մարսողական օրգանների ուլտրաձայնային հետազոտություն,
• ֆիբրոգաստրոդուոդենոսկոպիա,
• մագնիտա-ռեզոնանսային տոմոգրաֆիա,
• ստամոքսի պարունակության թթվության որոշում,
• լեղարտադրության ֆունկցիայի որոշում,
• արյան կլինիկական և կենսաքիմիական հետազոտություններ:

Բուժումը

Բուժումն ունի երկու ուղղվածություն. այրոցի նոպայից դուրս պահպանող թերապիա և տհաճ ախտանիշների զարգացման ժամանակ` բուժման հատուկ ռազմավարություն: Նոպայից դուրս շրջանում պետք է ժամանակին ընդունել բժշկի նշանակած դեղերը, հետևել նրա կողմից նշանակած սննդակարգին, բացառել ստամոքսի սեկրեցիան դրդող մթերքները:

Հարցեր, պատասխաններ, մեկնաբանություններ